आजाक मुख्य समाचार।
• स्वतंत्रता दिवसक मौक पर भारत क महामहिम राष्ट्रपति महोदय क हाथों उत्तराखंड पुलिसाक एक अधिकारी कैं भौत भल सेवा क लिजी ‘राष्ट्रपति का पुलिस पदक ‘ और 5 पुलिस अधिकारियों कैं भल सेवा लिजी ‘पुलिस पदक’ लै सम्मानित करि जाणैकि घोषणा हैरै।
•मौसम विभाग द्वारा राज्य क चमोली, देहरादून, उत्तरकाशी, बागेश्वर और पिथौरागढ़ में कति- कति सकर द्यो हुणैकि आशंका जतै राखि,वां काकड़ीघाट क्वारब और भवाली नैनीताल वाल रोड में लै पैर पखाड़ आ रयीं मशीन बाट ख्वलण में लागि रै। जल्दी खुलणैकि उम्मीद छू।
•उत्तराखंड अधीनस्थ सेवा चयन आयोग क परीक्षाओं में लाखों युवाओं भविष्य बर्बाद करणी लोगों में बटि बैयी ब्याव बखत एक ठुल मानि जानि पार्टी क जिला पंचायत सदस्य हाकम सिंह गिरफ्तार हैरो और पूछताछ में बतूण लाग रौ कि कसिक मोटि रकम में गरीब दुबाव मेहनती ज्वानोंक भविष्यक दगड़ खिलवाड़ करौ फिलहाल पूछताछ जारी छू,हाकम सिंह क ठुल ठुल अधिकारी और नेताओं दगड़ उठण- बैठण हुंछि य बातैकि मजबूती कैं देखते हुए आब लागणौ कि और लै ठुल म्वाट आदिम मुसदानि में फसि सकनी।
• उत्तराखंड राज्याक दूरस्थ विधानसभा क्षेत्र कपकोटाक विधायक सुरेश गढ़िया स्कूल में नानतिनों दगड़ बैठ बै भातक स्वाद लेते हुए फोटो में देखिणी ,वीक बाद लोग -बाग कुणयीं कि अगर तसि कै हमार नेता अधिकारी लोग जनता कैं मिलणी योजनाओं कैं आपण हाथैल ग्राउंड में जाबै महसूस कराल तो जरूर सुधार होल
