आजाक मुख्य समाचार-
• राज्याक मुख्यमंत्री पुष्कर धामी ज्यू अच्यांलूं दिल्ली में छन वां पुजि बै उनुल ठुल नेताओं दगड़ मुलाकात करि और दिल्ली में बणाईं जाणौ उत्तराखंड निवासक लै निरीक्षण करौ।
•आज रत्तै रत्तै पिथौरागढ़ लोहाघाट राजमार्ग बटि एक बुरी खबर ए,वां एक 11सालक नान तिरंगा यात्रा में शामिल हुणा लिजी आपण स्कूल जाणौ छी और उकैं तेज रफ्तार कैंटरलि टक्कर मार दै और वीक मौत है पड़ी,जैक बाद गौं वालोलि पिथौरागढ़ लोहाघाट राजमार्ग जाम कर दै।
•राज्य में लगातार द्यो बरख हुणाक वजैल पहाड़ी क्षेत्रों में बाट घाट उधरणी और जाग जाग रोड टुटणयी , और उणी जांणी लोगों कै भौत परेशानी हुणै। कएक जाग गाड़ गध्यार लै खूब चल रयीं मैदानी इलाकों में लै बारिशाक वजैल जाग जाग पाणी भरि जाणौं, स्कूली नान कैं स्कूल और कार्यलय जाणी लोगनकैं खूब परेशानी हुणै।
•देश में आज उपराष्ट्रपति चुनावक लिजी वोट डालीं गयीं जमैं एनडीए उम्मीदवार जगदीप धनकड़ और विपक्ष बटि उम्मीदवार मार्गेट अल्वा छन,खबर ल्यखण तक मतदान शुरू हैगो और मतगणना जुगुत चलि रै,उसी बताई जाणौं कि एनडीए उम्मीदवार जगदीप धनकड़ जीत पक्क छू फिर लै चुनाव परिणाम कैक पक्ष में आल य बात मतगणना बाद पत्त चलेली।
•स्वतंत्रता दिवस पर य बार विशेष अमृत महोत्सव मनाईं जाणौ और तिरंगा झंडों खूब मांग हैरै लोग बाग डबल कमूणाक चक्कर में जस्सै तस्सै झंडा बणै दिणयी और बजारों में बेचणयीं,झंडा संहिताक क्वै ध्यान न धरि जाणय जकैं द्यखते हुए आज हर घर तिरंगा अभियानाक परियोजना समन्वयक द्वारा जिला प्रशासनों कैं पत्र लेखि बैर झंडा संहिता पालन करण आदेश दि राखौ। परियोजना समन्वयक मोहम्मद असलम द्वारा बताई गौ कि झंडाक अनुपात 3:2 हुण चैं और अगर झंडैकि लम्बाई 50 इंच छु तो चौड़ाई 75 इंच हुण चैं।
• राज्य में कोरोना आजि बढ़न लागि रौ और स्वास्थ्य विभाग द्वारा जारी रिपोर्ट में बताई रौ कि पछिल24 घंट में उत्तराखंड में 331 केस कोरोना आयीं, और एक कोरोना संक्रमितेकि मौत ले हैरै कोरोना बढ़न के देखते हुए स्वास्थ्य विभाग बहुत सतर्क हैगो, जागरूकता और बचावैकि जुगुत में लागि गौ और टेस्टिंग लै बढ़ै है।
