नमस्कार स्वतंत्रता दिवसैकि भौत भौत बधै छू आंपु कैं।
देशक 76 वां स्वतंत्रता दिवस आजादी क अमृत महोत्सवाक रूप में खूब झरफराक दगड़ मनाई गो लालकिला में प्रधानमंत्री नरेंद्र मोदी हाथों झण्ड फहराई गो और देशाक नाम संबोधन लै भौ।
य बार देश आजादीक अमृत महोत्सव मनूण लागि रौ यैक असर गौं घरूं मैं लै खूब देखणतै मिलौ ,लोगबाग खूब तन मन धनैल देशभक्ति में पैलि बटि लागि छी।
जाग जाग स्कूलों में नानतिनों द्वारा सांस्कृतिक कार्यक्रम उर्याई गयीं समयाक दगड़ य सांस्कृतिक कार्यक्रमों में लै आब बदलाव देखण में ऊणौ जैक घाट ले छन और फैद लै छू आजकल आब सांस्कृतिक कार्यक्रमों में डीजे या लाउडस्पीकर में गीत चलै बैर नानतिन बटि बाटि बैर नाच खेल करणयीं। गायन वादन वाल चलन कम हुण लाग गौ। आज बटि चार छै साल पैलि जागर और चांचरी लै सांस्कृतिक कार्यक्रमों हिस्स हुंछी जो धीरे धीरे खत्म हैगो नाटक लै आब भौत कम देखीनी।य सब हमार नानतिनोंक रचनात्मकता कैं खत्म कर सकूं विचार करणै जरवत छू। किलैकि पहाड़ाक होनहार ठुल ठुल लोककलाकार य स्कूल और रामलील जस मंचों बटि निकलनी
मुख्यमंत्री पुष्कर सिंह धामी ल स्वतंत्रता दिवसाक अवसर पर मुख्यमंत्री आवास और गरमी वाली राजधानी गैरसैंण में झंड फहरा और राज्य वासियों कैं बधाई दै।
उत्तराखंड अधीनस्थ सेवा चयन आयोग में हई पेपर लीक वाल मामुल में भौत छाव और चिताव है बैर काम करणी एसटीएफ उत्तराखंड क टीम कैं आज मुख्यमंत्री उत्तराखंड सरकार क हाथों सम्मानित करौ और एसटीएफ टीम क खूब सराहना करि और कौ कि मेहनती ज्वानोंक भविष्यक दगड़ जो ले खिलवाड़ करौल उकैं आब माफ न करि जाओ चाहे क्वै कतुकै म्वट गांठी वाल नेता या अधिकारी हो उकैं दण्ड जरूर देई जाल औ ऊणी परीक्षाओं कैं समय पर करूणक पुर प्रयास हुणौ।
