आजाक मुख्य समाचार।
• उत्तराखंडाक मुख्यमंत्री पुष्कर धामील आज नवनिर्वाचित राष्ट्रपति द्रोपदी मुर्मू दगड़ मुलाकात और राष्ट्रपति बणनैकि बधाई दै।
• देश भर में आजादीक 75 साल पुर हुण पर अमृत महोत्सव मनाईं जाणौ दगड़ में हर घर तिरंगा अभियान लै चलि रौ। भारत तिब्बत सीमा पुलिस (ITBP) उत्तराखंड में 13000 फिटैकि ऊंचाई में तिरंगा झण्ड फहरै बैर स्वतंत्रता दिवसक भाव प्रकट करिं।
• देशभरि में स्वतंत्रता दिवस हैबै पैलि पड़नि वाल छुट्टी दिनन में लै डाकखाण खुल्लै रौल,य डाकखाण हर घर तिरंगा अभियानाक लिजी राष्ट्रीय झंड बाटण और ब्यचणक काम कराल, संचार मंत्रालय बटि एक विज्ञप्ति जारी करबै बताई गो कि सात,नौ और चौद अगस्ताक दिन सबै डाकखाणों में झण्ड ब्यचणाक लिजी खास जुगुत करि जाल।
• राज्य में कोरोना आजि बढ़न लागि रौ पछिल 24 घंट में स्वास्थ्य विभाग बटि आई बुलेटिनक अनुसार इतवारक दिन बागश्यर,चमोली चंपावत में एक लै कोरोना केस न मिल जबकि देहरादून में 100,हरद्वार में 09,नैनताल में 16,पौढ़ी गढ़वाल में 01, पिथौरागढ़ में 01 , रूद्रप्रयाग में 01, उधम सिंह नगर में 07,और उत्तरकाशी में 12 कोरोना मरीज मिल रयीं। कुल मिलै बैर उत्तराखंड में आब एक्टिव कोराना केस 1895 हैगै।
• प्रदेश में आपण आपण काम में कुछ विशेष करणी वाल 12 स्यैणी मैंसों कैं आज राज्यपाल द्वारा वीरांगना तीलू रौतेली पुरस्कारैल सम्मानित करौ, और दगड़ में 35 महिलाओं कैं राज्य स्तरीय आंगनबाड़ी कार्यकर्ता सम्मान लै दिई गो।
• आल्माड़ैकि बाल मिठै मोदी जी तक पूजूणी अल्माड़ाक लाल लक्ष्य सेनाक नाम आज एक और नई उपलब्धि जुड़ गे लक्ष्य सेनल राष्ट्रमंडल खेलों में चलि बैडमिंटन पुरूष एकल में स्वर्ण पदक जित बैर अल्माड़ उत्तराखंड समेत पुर देशेकि छाति चौड़ करि है। बैडमिंटन पुरूष एकल फाइनल में उनूल मलेशियाक के एंग जे योंग कैं 19-21,21-9,21-16 हरै बैर य उपलब्धि आपण नाम करि,य सुनक पदक जितियाक बाद लक्ष्य सेन राष्ट्रमंडल खेलोंक पुरूष एकल में पदक जितणी भारताक 10 ऊं खिलाड़ी और सुनक पदक जितणी चौथूं खिलाड़ी बण गयीं।
• आज सौंणक म्हैणक चौथूं सोमवार पहाड़ समेत मैदानी क्षेत्रों में लै शिवजी मंदिरों में खूब भीड़भाड़ रै लोगबाग दूर दूर बटि नै – ध्वै बैर आपण- आपण सामर्थ्य हिसाबैल मंदिरों में जाबैर जल चढ़ूढ़ में देखीण लाग राछि।
बागेश्वर महिपाल दाज्यु द्वारा प्राप्त बागनाथ मंदिर बागेश्वर बटि फोटो आरै यां आज उत्तराखंड सरकार में कैबिनेट मंत्री चंदन राम दास तरफ बटि खीरक प्रसाद बांटि गौ।
