कुमाउनी समाचार बुलेटिन में अगर आपुं लोग लै क्वै खबर या सूचना दि सकछा आपुं लोग हिन्दी कुमाउनी में खबर भेज सकछा। केवल व्हाट्सएप करिया- 7409439937. आजाक मुख्य समाचार।
• कुमाऊं रेजीमेंट सेंटर रानीखेत में अग्नि वीर भर्ती चलि रै आज बागश्यर जिल्लाक 3574 ज्वान नैल यमैं भाग ल्है। अघिल कै उणी दिनों में एआरओ अल्माड़ाक नैनीताल,आल्माड़ और उधमसिंहनगर क कुल 30,684 ज्वान य भर्ती में आपण जोर दिखाल।
•पछिल दिनन राज्य में भौत जाग आपदा जस हालात पैद भयीं और भौत तबाही लै मचि रै आपदा में लापता हई मनखियों कि ढूंन खोज करणाक लिजी एसडीआरएफ, एनडीआरएफ, पुलिस और दमकल विभाग क य दिनन भौत दौड़ भाग हैरै। मुख्यमंत्री धामी द्वारा आपदा प्रबंधन और लोकनिर्माण विभाग कैं आपदा में हई नुकसान क जल्दी है जल्दी दुबार बसूणाक जुगुत करणक आदेश दि राखौ।
• उत्तराखंड अधीनस्थ सेवा चयन आयोग में हई पेपर लीक मामुल में 22 ऊं गिरफ्तारी बेई भै जमैं बागश्यर जिल्लाक मलसूना काण्डा में पढूंणी वाल एक मास्टर जगदीश गोस्वामी कैं एसटीएफ द्वारा गिरफ्तार करि रौ। जगदीश गोस्वामी घर अल्माड़ बताई जाणौ,आरोप छू कि मास्टर आपण क्षेत्राक पेपर दिणी लौंडों कें धामपुर ल्हिगौ और पेपर है पैलि सब सवालनक जवाब वां रटाई गो
•उत्तराखंड अधीनस्थ सेवा चयन आयोग में हई पेपर लीक मामुल आब बढ़ते और अलझीते जाणौ और धरपकड़ में भौत ढील हुणै जकैं देखते हुए बेरोजगार संगठनों और राजनितिक दलों ल य मामुल में सीबीआई जांच करूणैकि मांग उठाई जाणै। भैम य लै हुणौ कि कैं य मामुल राज्य में राजनीतिक हलचल लै पैद कर सकूं और सरकारक जाड़ लै हलकान है सकनी।
