कुमाउनी समाचार बुलेटिन में अगर आपुं लोग लै क्वै खबर या सूचना दि सकछा आपुं लोग हिन्दी कुमाउनी में खबर भेज सकछा। केवल व्हाट्सएप करिया- 7409439937. आजाक मुख्य समाचार।
• उत्तराखंडक मुख्यमंत्री पुष्कर सिंह धामी आज लांस नायक चंद्रशेखर हर्बोला क अंतिम दर्शन करणाक लिजी हल्द्वाणी पुजी।
हल्द्वाणी रूणीं लांस नायक चंद्रशेखर हर्बोला क 38 साल बाद सियाचीन ग्लेशियर में शहीद हई मिलैं। आपरेशन मेघदूताक दौरान ऊं ग्लेशियर में हरै ग्याछी।
• कैबिनेट मंत्री चंदन राम दास ल अधिकारियों कैं ‘एक जिल्ल द्वि उत्पाद’ योजना कैं भल ढंगैल चलूणाक और प्रदेश में स्वरोजगार बणूणाक निर्देश देई।
• राष्ट्रमंडल खेलों में देशाक लिजि सुनक पदक जितणी आल्माड़ाक लाल लक्ष्य सेन दगड़ फोन में बात करि।
• पहाड़ों में य बीच मौसम भौत बदईण जैक असर लोग बागोंक तबीयत पर लै पड़न लागि रौ,गौं घरूं मैं वायरल बुखार चलि रौ जैक वजैल अस्पतालों में लोगोंक लाइन लागि रै। डाक्टर लोग बतूणई की य मौसम में पीणीं पाणीं उमाई बैर पीण चैं और तवै कम करण चैं
• राज्य भर में आज बटि भदौक म्हैण लाग गौ आज संगरात छी और घ्यू त्यार मनाई गो, पहाड़ों में गोर भैंस आब कम है गईं लोगबाग बजार बटि घ्यू ल्हिबैर त्यार मनूण लागि रईं ।आज द्यापतनकैं ओग लै चढ़ाई जां जमैं चौमासक नई साग पात पैलि द्यापतों कैं चढ़ाई जानि और फिर आज बटि उननकैं खाई सकीं।
•जो लोग आंखन संबंधी समस्या झ्यलण लाग रईं उनार लिजी भलि खबर छू कुमाऊं क मानि जानि वेदांता नेत्रालय बागश्यर जिल्ल में निशुल्क आंखन जांच शिविर लगूणौ। शिविर में विशेषज्ञ डाक्टर निशुल्क आंखनाक दवाई ले बांटाल,य शिविर 20 तारिक छंजराक दिन तहसील रोड में उत्सव बैंकट हाॅल में रत्तै आठ बजि बटि दोफरि में 02 बाजि तक लागल।
• अल्माड़ बटि ज्योति भट्ट ल आपण यूट्यूब चैनल “jyoti bhatt jb” में नई विडियो ” जब पहाड़ी आंटी भौ देखने जाती है” हालि है । ज्योति भट्ट क ठेठ पहाड़ी अंदाज और अल्मोड़ि ठसक वालि कुमाउनी भाषा में विडियो देखण लैग हुनि। ज्योति भट्ट कुमाउनी भाषा विकासक लिजी अहम योगदान दिणै एक बारि इनर विडियो जरूर देखिया।
