आजाक मुख्य समाचार।
•पहाड़ों में कएक जागन दिन भर बादव लागि छी और कति खूब गाड़ खाव हैरै भौत जागन रोड ब्लाक हुणकि लै खबर छू,अछ्यान भोव पहाड़ में यात्रा करण भौत कठिन हुणौ जब जरूरी छ तबै यात्रा करिया,मौसम विभाग द्वारा उणी दिनों में पहाड़ी जिल्लों लिजी यलो और कति रेड अलर्टक लिजि चिताव कर राखौ।
चमोली जिल्लाक नंदानगर बटि य चित्र आ रौ
• पहाड़पन चुनावों में नेता लोग खुब फौंस मारनी यस कर द्यूल उस कर द्यून लेकिन पहाड़ाक हाल दिनों दिन और जै खराब हुणयी आज अल्माड़ जिल्लाक कनारीछीना कुनखेत बटि घटना सामणि में ऐ वां राताक 11 बाजि एक स्यैणी मैंस तनु कैं प्रसव पीड़ भै,चौमासाक दिन छन पहाड़न में आंव खूब हैरो स्याप किड़न लै डर हैरै जाग जाग बागक लै आंतक चलि रौ यास में अचानक कुनखेताक गौं वालों कैं कि करनु कस करनु है पड़ी डोली और उज्यावैकि जुगुत करण तक राताक 12बाजि आशा कार्यकर्ता गीता देवी और गौं पनाक मैंस तनु कैं ल्हिबैर कनालीछीना रोड में पुजि और फिर अस्पताल गेयीं ,अघिल कै जानकारी आजि प्राप्त न है रय जच्चा बच्चा सकुशल हुणैकि कामना करनु।
• जगदीप धनखड़ देशाक चौदूं उपराष्ट्रपति बड़ गईं धनखड़ कैं 528 भोट मिलीं दुसर तरफ विपक्षी उम्मीदवार मार्गरेट अल्वा कैं 182 वोट मिलीं।
•भारत और वेस्टइंडीजक चौथूं टी 20 मैच में भारतैल वेस्टइंडीज कैं 59 रनोंल हरै है। ये जीताक दगाड़ आब भारतेकि सीरीज में 3-1 की अजेय बढ़त बणैं है। सीरीजक आखिरी मैच आज खेलि जाल।
•अच्याल भोव राज्य में रोड दुर्घटना ज्यादा हुणयीं मसूरी शहराक लाइब्रेरी क्रिंग्रेक रोड में आज रोडवेजैकि एक बस दुर्घटनाग्रस्त हैरै जमें 39 झाणिं सवार छी फिलहाल 15 लोगों कैं हल्क चोट छू और कुछ लोगों कैं ज्यादा चोट पटक लागि रै जनुकैं नजदीक सिविल अस्पताल में भर्ती कर राखौ।वां लगातार द्यो हुणाक वील राहत बचाव करण में दिक्कत हुणै।
•UKSSSC भर्ती घोटाला दिनोदिन अलजीते जाणौ हिरासत में धरि आरोपी रोज नई नई राज खोलणी मीडिया रिपोर्टों मानि जाओ तो कई जाणौ कि य घोटाला में नेताओं लै मिलीभगत छू उनूकैं बचूणाक लिजी खूब जतन लै करि जाणौ खैर आजि तलक क्वै सफेद कुर्त वालक स्पष्ट नाम सामणी में नै ए रय लेकिन भैम खूब हुणौ कि क्वै तो म्वट नेता त घोटाला में शामिल छू गरीब दुबाव आदिम बिना नेताओं सहार मदद करिये इदु ठुल काम न कर सकन STF आजि छानबीन में लागि रै जसै क्वै हलचल होली बतूंन।
•आजादीक 75 साल पुर हुण पर अमृत महोत्सव खूब धूम धामैल मनाई जाणौ गौं घरूं मैं सुख सुविधा पुजौ न पुजौ तिरंगा झंडा हर घर में लगूणक लक्ष्य सरकार बणै ल्हिरै और कार्यकर्ता गौं गौं में जाबैर तिरंगा झंडा लगूणयी।
