आजाक मुख्य समाचार।
• उत्तराखंड सीमा में भारत -तिब्बत पुलिस (आईटीबीपी) क एक स्यैणियोंक दलेल सीमा में एक गश्त (17,000फिट) पुर करि हालौ।य गश्तैकि थीम आजादीक अमृत महोत्सव और हर घर तिरंगा अभियान पर आधारित छी। आईटीबीपी ल 2016 बटि आपण चौकीन में स्यैणियों कैं तैनात करण शुरू करौ,ये बखत में पुरै बल में 2500 स्यैणी आपणि सेवा दिण लागि रयीं।
• मुख्यमंत्री पुष्कर सिंह धामी ल आज आजादीक अमृत महोत्सवाक तहत हर घर तिरंगा अभियानाक लिजी राजधानी देहरादूनाक गांधी पार्क में आयोजित तिरंगा रैली कैं हर्युं झण्ड दिखा,उनूल कौ कि 13 बटि 15 अगस्त तक चलणी वाल य अभियान में राज्य भरिक 20 लाख घरन में हर घर तिरंगा पुर हौसिक दगड़ मनाई जाल।
• आज रत्तै रत्तै राज्याक बिरोजगार ज्वानों लिजी निराश करणी खबर ऐ, जमें बताई रौ कि आयोग द्वारा अघिल कै उर्याई रयी आठ परीक्षाओं पर फिलहाल रोक लागि गै य आठ परीक्षाओं लिजी लगभग तीन लाख युवाओंल आवेदन कर राख छी, जमैं फॉरेस्ट गार्ड क 894 पद, पटवारी – लेखपाल क 520 पद, पुलिस कांस्टेबल क 1521 पद, पुलिस एसआई क 272 पद, लैब असिस्टेंट भर्ती क 200 पद, सहायक लेखाकार री एग्जाम क 662 पद, उत्तराखंड जी भर्ती क 76 पद और गन्ना पर्यवेक्षक क 100 पद शामिल छन। अच्याल भोव उत्तराखंड अधीनस्थ सेवा चयन में भौत ठुल घोटाला है रयीं जमैं रोज रोज नई नई उलझन बढ़ते रूणै, लाखों बिरोजगार ज्वानों लिजी भौत परेशानिक समय छु जो नानतिनोंल खूब मेहनत कर रखै उनार लिजी आयोग में उपजी य बवालैल भौत मुसीबत ठाड़ करि है। गरीब दुबाव नानतिनोक सब स्वीण उधरते रूणयीं सरकार लै इनार तरफ पट्ट आंख बुजी ल्हिरै।
• मां बाराही धाम देवीधुर में 12 दिनि कौतिकक बेयी शुभारंभ हैगो, उत्तराखंड वन विकास निगमाक अध्यक्ष कैलाश गहतोड़ी ल सोमवारक दिन कौतिक शुभारंभ करौ,य मौक पर नानतिनोंल तिरंगा यात्रा और स्यैंणीयोंल कलश यात्रा निकाली मंदिर कमेटी सदस्योंल देवीधुरा स्टेशन बजार बटि मंदिर तलक छोलिया दलैकि शोभायात्रा निकाली।कोरोनाक वजैल एलसाल य कौतिक द्वि साल बाद उर्याई जाणौ जैक वील मैंस भौत खुशी छन।
कुमाउनी भाषाक सज- समाव में उरातार लागि ,देश विदेशों तक पढ़ि जाणीं कुमाउनी मासिक पत्रिका पहरू क संपादक डॉ हयात सिंह रावत ज्यू कैं हिमाद्रि फिल्मस द्वारा देहरादून में पछिल 6 अगस्ताक दिन आयोजित एक कार्यक्रम में सम्मानित करि गो और उनार द्वारा कुमाउनी भाषा विकासक लिजी जो जुगुत चलि रै वीक भौत सराहना करी गै ।आपुं लोगों कैं बतूण चानूं की डाॅ. रावत ज्यू द्वारा नवंबर 2008 बटि पहरू मासिक पत्रिकाक संपादन लगातार करि जाणौ। डाॅ रावत ज्यू द्वारा कुमाउनी भाषा विकासक लिजी और कुमाउनी भाषा लेखनाक बाट में लै ठुल ठुल काम करि रयीं।
